Wanneer dinge gaan staan: (Garage Kerk 30 Junie 2020)

As gevolg van 'n siekgevoel wat nie so lekker lyk voor 'n kamera nie, is vandag se Garage Kerk in geskrewe formaat. Lekker lees

"Jy weet", sê ek vir Chanelle die ander aand: "Dis makliker om die gemors by SAL uit te sorteer as om vir Cilliërs aan te trek."

"SAL staan darem stil", merk sy op en ons albei lag, maar net vir 'n oomblik. CIlliërs hardloop alweer in die gang af en dit wat by SAL gebeur en elders in die wêreld is nie eintlik 'n grap nie.

Dinge het gaan stilstaan en alles voel deurmekaarder as die kyk wat 'n draaibal bouler gee nadat AB de Villiërs weer sy aflewering bygekom het asof die bal nie gedraai het nie.

Kan die bybel ons dalk help om te verstaan waarom dinge stilstaan. Wag net so bietjie, voor die Openbaring verklaarders weer aan die comment raak. Ons gaan nie verder gesels oor die eindtyd nie. As jy dit wil doen, kies 'n ander forum. Vandag skryf ek eerder oor 'n paar gevalle waar dinge gaan stilstaan het en hoekom.

Hier is 'n paar eerbare gebeure wat genoem kan word, maar wat nie noodwendig op ons van toepassing is vir vandag nie:

1. Die keer toe die son gaan stilstaan het en die Israeliete teen een of ander nasie kon veg en wen. Dis die keer wat Aaron en Hur Moses se hande in die lug moes hou.
2. Die keer toe Moses die volk deur die rooisee moes lei. As die water nie stilgestaan het nie, was hulle weggevoer met die water - Tsunami-styl. Hmmm. Moses is nou al by twee van hierdie verhale betrokke.
3. Die volk wandel vir 40 jaar in die woestyn omdat hulle te bang was vir die reuse in Jerigo. Moses is regtig nogals baie betrokke by hierdie verhale.

Elk geval.

Die bybel is vol van raad oor wanneer dinge stilstaan en tyd (nee, ons gaan ook nie "daar is'n tyd vir alles"-teks nou gryp nie).

Die Psalms help ons weereens daarmee. Dawid was 'n persoon wat gereeld moes leer wat om te doen en nie te doen nie wanneer dinge stilstaan.

Hy skryf in een van die Psalms "my tyd is in U hand". Dawid het geleer dat dinge nooit oornag gebeur nie. Om te wag op God is belangrik.

Habakuk skryf hieroor in Habakuk 2. Hy sê: "Ek wil op my uitkyktoring gaan staan en wag om te verneem wat God vir my wil sê..."

Post-moderne mense sukkel om te wag. Dinge moet altyd dadelik gebeur. Dalk is dit waarom God vir volk so baie vakansies gegee het. Dalk is dit waarom die boere hulle grond elke sewe jaar moes laat rus.

Alles moet leer om te wag, om stil te staan, en ek en jy ook.

Nou staan ons almal stil op 'n manier, en DAAROOR is ek nie een oomblik hartseer nie. Vir meer as 3 maande bad ek my kinders elke aand - dis een van my hoogtepunte. En daar is talle meer.

Waarom het God jou laat stilstaan nou dat ons almal moet stilstaan?

Wat is dit wat God vir jou vandag sê, Habakuk?

​Gaan wag so bietjie...