Uitnemendheid deel 11 - jong leierskap!

3 maniere om as jong leier te dien!

Hierdie blog wil eerder fokus op drie maniere wat jong leiers prakties kan seker maak dat hulle 'n verskil kan maak.

1. Wees 'n dienaar van jouself!

Jy is nie jou gawes en talente nie. As jong leier het ek telke male gedink my gawes en talente definieer my. Dit doen nie. As gawes en talente van God af is, dan beteken dit dat dit nie aan my behoort nie. En wanneer ek besef dat dit nie aan my behoort nie, kan ek 'n dienaar van my eie gawes wees.

Om 'n dienaar van jou eie gawes te wees, beteken dat jy dit nie doen op jou eie terme nie, maar op Sy terme.

God is die een wat bepaal hoe ons ons gawes moet gebruik.

As jy vandag wil lei as jong leier, klim uit jouself, kyk van buite na jouself en vra vir God hoe Hy dit wil gebruik wat binne-in jou is.

Hierdie roete van onselfsugtige leierskap het my wind al uit geslaan 'n keer of wat. Dit laat my egter elke keer nederig om te sien wat God in my doen as ek terugstaan en Hom toelaat om oor te neem.

Klim uit jouself, en word 'n dienaar van jou Godgegewe talente.

2. Doen wat jy sê jy gaan

As jong leiers wil ons graag onsself bewys. Jy hoef nie die wêreld te verander op 25 nie, maar jy kan seker maak jy doen wat jy sê.

Laat jou ja, jou ja wees, en jou nee, jou nee. Jesus het so iets een maal gesê.

Ek trap egter gereeld nog in die gat om te veel te beloof en te min op te lewer.

Stap 1 waarna ek net-nou verwys het, het gemaak dat ek minder in hierdie gat trap.

3. Pasop vir mooi praatjies!

Omdat ons geneig is om onsself te wil bewys vat ons telke male dan ook take aan waarvoor ons nie altyd reg is nie. Daar is niks meer vleiend as 'n ouer leier wat 'n jong leier vra om met 'n moeilike saak te help nie.

In enige taak wat jy gevlei voel, GAAN TERUG NA STAP 1.

Vra jouself af of dit God is wat jou wil gebruik, of jou eie ego.