 Toe ek 'n tiener was... ... het ek die SA Rugby gelees. My lewe het bestaan uit rugby speel. En tog toe my ma kanker kry het ek skelm bybel gelees. Selfs al was ek nog nie 'n gelowige nie. As jou ma dit dalk nie gaan maak nie, dan lees jy bybel. Die mens gryp altyd na die bybel as dit taai gaan. As tiener was die SA Rugby tydskrif egter 'n voorbeeld van hoe my lewe moes lyk. Toe ek 'n student was... ... wou ek die teoloog Marten Luther wees. Nie soos hy nie! Ek wou hy wees. Dit was natuurlik 'n goeie verskoning om bietjie te veel bier soms te drink. Luther was mos 'n Duitser, en hulle drink bier. Dus het ek soveel as moontlik teologiese boeke gelees (ek doen nogsteeds, net nie teen dieselfde spoed as toe nie - Jammer Prof, ek wens ek het meer tyd gehad). Dit was deel van my voorbereiding om 'n dominee te kon word. My vrees en motivering vir al die lees? Dat ek nie genoeg sou weet as 'n dominee nie... Toe word ek 'n dominee... ... 'n Jeugdominee. Wat beteken ek het baie tyd saam met tieners spandeer. Ek wou 'n goeie voorbeeld wees vir hulle. Dus het ek biografieë gelees van mans wat my inspireer. Van Sean Connery en Paul Newman tot Tony Dungy en Al Pacino. Dit was 'n seisoen waarin dit nodig was, want ek het vrae daaroor gehad. En in dit alles het God se Woord nie verander nie!"Alles wat vooraf in die Skrif opgeteken is, is tog opgeteken om ons te leer sodat ons deur die standvastigheid en bemoediging wat die Skrif ons gee, vol hoop kan wees."
0 Comments
Leave a Reply. |
Gerrit VisserGerrit is die gemeente se leraar en skryf gereeld oor die nuutste gebeure in die gemeente Archives
September 2021
Categories |
RSS Feed