Die uitnemendheid van Jesus - Matteus 7:7-8

Moenie ophou soek nie!

“Vra, en vir julle sal gegee word; soek, en julle sal kry; klop, en vir julle sal oopgemaak word,
want elkeen wat vra, ontvang; en elkeen wat soek, kry; en vir elkeen wat klop, sal oopgemaak word.

Moenie ophou vra en soek nie. Doen dit by uitnemendheid. Die gevolg is 'n diep persoonlike verhouding met God.

Hierdie teks is bedoel vir diegene wat ernstig opsoek is na God, en na Sy Koninkryk. Om dit te soek, neem inspanning, opoffering en deursettingsvermoë.

Daar is egter 'n prys daarvoor. Jesus self maak vir ons oop. Hy is die een wat gee. Ons hoef nie perfek te wees in ons pogings van klop en soek nie. Ons moet net begin, en dan aanhou.

Moenie ophou nie!

Daardie deursettingsvermoë, sê Paulus later in die Nuwe Testament, kweek 'n egtheid van geloof. Daardie klop waarna Jesus verwys in hierdie teks is 'n persoonlike proses. Een waar ons gereeld klop om antwoorde te kry.

Dit gaan oor intieme gebed. Hier word nie verwys na 'n vinnige klop wanneer jy sien jou geld raak min nie. Dit gaan eerder oor 'n konstante soeke na God rondom 'n saak wat jou diep raak. 'n Saak wat jy dalk nog nooit met iemand eers bespreek het nie.

Hierdie gebeds-vra waarna verwys word is 'n uitnodiging van Godself wat vra dat ons na Hom gaan op 'n baie persoonlike manier.

Moenie ophou vra en soek nie. Doen dit by uitnemendheid. Die gevolg is 'n diep persoonlike verhouding met God.

Wanneer ons in uitnemendheid vra kan ons weet dat God by uitnemendheid gee, al gebeur dit nie dadelik nie.

Hy gee gewoonlik oor 'n periode van tyd vir ons antwoorde. Om te soek vir iets wat moeilik bekombaar is, beteken ook dat die proses dus lank neem. Soek lank, sodat jy weet dit is God wat vir jou die antwoorde gee.

Laastens glo ek persoonlik dat gemeentes nie geestelik kan groei as ons nie 'n konteks skep vir mense om hierdie tipe moeilike vrae vir God te vra nie. Mense gaan nie moeilike vrae oor God deel as ons nie 'n ruimte vir dit gee nie.

Mag jy deel wees van so 'n ruimte wat 'n konteks skep vir geestelike groei wat diep en eerlike vrae vra, en diep en eerlik soek.