Die uitnemendheid van Jesus - Matteus 6:22-23

Kies die lig!

“Die lamp van die liggaam is die oog. As jou oog goed is, sal jou hele liggaam lig hê.

​Maar as jou oog sleg is, sal jou hele liggaam sonder lig wees. As die lig in jou donker is, hoe donker moet dit dan nie wees nie!”

Jesus verwys hier na 'n doodsheid wat intree in mense se lewens, en dat dit sigbaar is in hul oë. Ons is vandag presies dieselfde. Hoe baie keer gebeur dit nie dat ons in mense se oë kyk en sien dat daar 'n stuk hartseer is nie.

Ander kere kyk ons in mense se oë en sien egter dat daar meer as hartseer is. Daar is 'n hartseer wat oorgegaan het tot 'n lewe van haat. Iemand wat die verkeerde weg gekies het.

Die rede waarom ons mense sien wie se oë dood is, is omdat daar iets slegs moes gebeur het. Niemand word boos gebore nie. Korrek, nie eers die politikus wat brand en moord verkondig nie.

Jesus roep ons tweedens in hierdie teks om seker te maak ons kyk reg. Ons moet seker maak ons oë is so dat mense die lig in ons raaksien, maar ook sodat ons die lig in ander raak sien.

In hierdie video word verduidelik presies wat lig is. Die eerste paar woorde is belangrik vir gelowiges. Dit herinner ons aan die feit dat ons nie kan sien as dit nie vir lig is nie. Ons kan nie ervaar, liefwees, lag of enigiets anders doen as dit nie vir lig is wat ons laat sien nie.

Die lig in ons is die Godself. Hy verlig ons lewens sodat ons kan lag en leef en al hierdie pragtige dinge beleef wat ons heelal noem.

​Kom ons kies om deur die uitnemendheid van Jesus te leef, wat ons leer om lig te soek in alles en almal.

Mag jy vandag weet dat diegene wat nie lig in hul oë het nie, nie so gebore is nie, en mag jy die lig in jou vir hulle uistraal sodat hulle kan leef soos God wil hê hulle moet.