Die lewe van uitnemendheid - deel 7 - Meer as net idees - 3 beginsels om jou te help om moeilike take deur te voer!

Lees Nehemia 1 -3 om te sien hoe hy bereid was om sake deur te voer. Dis ook duidelik sigbaar in hoofstuk 6-8.

Daai goeie idee wat jy het, dis net 'n idee totdat dit voete kry.

Een van die belangrikste lesse in Nehemia se lewe is dat hy doen wat hy sê hy sal. Hy is bereid om die saak deur te voer wat op sy hart gedruk is. Baie van ons het goeie idees, maar voer dit nie deur nie. Baie mense begin met 'n taak, maar voltooi dit nooit nie.

Nehemia leer ons om deursettingsvermoë te hê om ons roeping deur te voer. Sy roeping was om die mure van Jerusalem te gaan herstel. Dit was dalk vir baie ander mense soos hy 'n goeie idee, maar hulle het nie gegaan nie. Hulle het ook nie hand opgesteek om die verskil te gaan wees nie.

Nehemia was bereid om dit te doen!

Te midde van terugslae was hy bereid om 'n verskil te gaan maak.

Kyk na die volgende wysheid wat die bybel in Spreuke gee oor hoe om 'n saak deur te voer van begin tot einde:

1. Aanvaar ervare mense se raad: Spreuke 1:25 sê die skrywer dat jongmense nie sy raad wou volg nie. So maklik kry ons as jong leiers 'n idee oor hoe om 'n verskil te maak, maar wanneer ons die idee kry word ons oënskynlik afgeskiet deur ouer, meer ervare mense.

Moenie moed verloor as mense jou raad gee en jou idee wil help vorm nie. Die beste planne op aarde het begin by een idee, wat deur groepe ontwikkel is. Daardie goeie raad kan jou help om jou taak of idee tot uitvoering te bring, maar ek en jy moet volwasse genoeg wees om dit te aanvaar.

2. Bou ander op. In Spreuke 15:4 lees ons dat kalmerende woorde lewe bring. Dit geld nie net vir hoe ons met ander praat nie, maar ook met onsself. Wanneer ons 'n uitdaging in die gesig staar of opposisie kry kan ons onsself maklik afbreek. Dis nie God se wil dat ons dit met onsself doen nie.

Om 'n taak kan deurvoer moet jy bereid wees om jouself en diegene rondom jou te kalmeer. Dit gee lewe, sê Spreuke vir ons.

3. Moenie instorm nie! Hierdie is 'n moeilike beginsel. Wanneer ons 'n goeie idee het om 'n verskil te maak, moet ons nie instorm nie. Spreuke 19:2 sê oorhastigheid bring foute. Dus moet ons dit wat ons wil bereik moei evalueer, en  dan deeglik beplan. Dit help ons om goeie leiers van onsself en ander te wees. Wanneer ons 'n taak goed beplan kan ons dit deursien tot die einde wat ons het reeds gekyk na wat die moontlike uitdagings kan wees.

Dis my gebed dat hierdie drie beginsels jou sal help om die take wat op jou bord lê deeglik te kan afhandel.

Wat helpjou om die take wat jy deurvoer deeglik af te handel?